بلاص المش

المش

 

المش المصرى أكلة لها معجبوها ، وهو أكلة حريفة تثير الإعجاب والشفقة فى نفس الوقت .

ودائما الأزهريون الذين كانوا يدرسون فى الأزهر زمان كانوا أصحاب نكتة ، وكانوا يسكنون بجانب المعاهد الأزهرية فى المدن الرئيسية قبل انتشار المعاهد الأزهرية الآن . وكانت أحوال الناس زمان صعبة وبسيطة فكانوا يحضرون الأكل من القرية ، وكان كل طالب عليه الأكل للمجموعة أسبوعا ، فيأتى أهله بالزّوادة  يعنى بالأكل وغالبا مايكون مع الزّوادة دكر بط أو دجاجة أو أوزة يبدؤون يوم وصولها بأكلها . ثم يكون باقى الأسبوع أى حاجة . وكانت أحد المجموعات قد أحضرو بلاص مش وضعوه فى شقتهم . فإذا لم يتوفر الطعام يفتحون البلاص ويأكلون خبز ومش .

وكانوا قد كتبوا على البلاص كلمة ( غيرها ) . فإذا جاءهم ضيف قالوا هات ياإبنى العيش وطبق غيرها . فلما سُئلوا عن سبب التسمية ب ( غيرها ) قالوا

ألم تسمع قول الشاعر :

من لم يمت بالسيف مات بغيرها 

                          تعددت الأسماء والموت واحد

وبلاص المش له مراسيم خاصة ، وصنع المش له خبراؤه وأستعرض لكم بعضا من فنونه إقتباسا من موقع فتكات، فنبدأ بالمحتويات التى تدخل فى صناعة المش بدون تحديد مقادير .
المحتويات :

                                    
                                      جبنه قريش

 

                                          لبن حليب

 

                                           خميرة مش

  

                                       فلفل شطه حامى

 

شطه حاميه(بفضل الشطه السودانى)

دنكار لونه ابيض زى الملح وهو ده اللى يخلى المش مش يدود

 

                                               ملح

  ويبدأ المشوار بشراء بلاص من بلاليص العسل من عند بياعى العسل المتجولين لأن العسل يكون قد سد المسام التى ترشح السوائل . وأحلى مش يكون مخزن فى بلاص عسل كما يقولون .

 وهذه صورة البلاص من داخله قبل غسله من العسل

ونبدأ بإحضار الجبنه القريش ونرش عليها كيس الملح ونقلبه فى بعض جيدا ، بعدها نضع الجبن مع الملح فى قطعة شاش ونعلقها لتصفية ما بها من ماء الشرش 

واللبن الحليب يتم غليانه ويترك ليبرد  بالقشطه بتاعته لأنها تجعل المش دسم وحلو ثم نضيف عليه الشطه والدنكار ونقلبه

 

وتانى يوم نبتدى نعمل المش فنُحضر البلاص ونحط فيه نص كمية خميرة المش ونص كمية اللبن الحليب المخلوط بالشطه والتنكار ونبتدى نسقط فيهم نص كمية الجبنه

 

 

 

وبعدكده اضيف نص كمية الفلفل الاحمر

 

وده شكل البلاص من داخله بعد خلط  نصف المكونات

ونكمل باقى المقادير بنفس الطريقه حتى ننتهى منها كلها

نبتدى نقفل البلاص كويس جدااااااااا حتى لا يدخل اى هواء داخله لانه لو تعرض للهوى ينشط فيه الدود حتى لو حطينا الدنكار...

 

دى الورقه اللى كان مسدود بيها بلاص العسل بندخلها فى كيس بلاستك ونكبسها فى فوهة البلاص كويس

بعد كده نلبس البلاص كيس ونربطه بقماشه او شريطه او دوباره المهم نربطه بحاجه جامده تحكم الفتحة

 

 وبعد ذلك نلبسه كيس بلاستك تانى ونحكمه جدا على فوهة البلاص 

 

وبعد ذلك نحضر قطعة من القماش  ونطبقها أربعه ونضعها فوق فوهة البلاص ونربطها بشريطة بإحكام

بعد كده نفرش فى البلكونه أو فوق السطوح كيس بلاستك ونجيب حتة قماشه قديمه ونلفها زى الحوايه ونحط فوقها البلاص لانه ممكن فى اول الامر يرشح من تحت شوية سوائل وحنلاقى لونها اسود وده من العسل بس بعد كده هيبطل 

 

ونسيبه على كده  6 شهور ..اقل حاجه 6 شهور ومانفتحش عليه خالص بس كل يومين نخرج البلكونه نشيله ونهزة بشكل دائرى علشان الجبنه والمش يتقلبو مع بعض وكمان نحط عليه بلاطه من فوق أو اى حاجه تقيله 

ملحوظه

البلاص لما نيجى نعبيه المش والجبنه  لازم مايكنش مليان يعنى يبقى نص البلاص او تلتينه مليان والباقى فاضى لان المش بيفور وبيزيد

 

وبعد انقضاء المدة التى لا تقل عن ستة أشهر يمكن فتح البلاص وتناول المش